Rusiyanın müdafiə naziri Andrey Belousovun Azərbaycana səfərinin bu ilin oktyabr ayında baş tutacağı gözlənilir.

Bu barədə Azərbaycanın Rusiyadakı səfiri Rəhman Mustafayev Sankt-Peterburq Beynəlxalq İqtisadi Forumunda keçirilən "Rusiya-Azərbaycan" sessiyasında çıxışı zamanı məlumat verib.

Səfir bildirib ki, Rusiyanın müdafiə naziri üçün Azərbaycanın açıq dəvəti mövcuddur və onun oktyabr ayında Bakıya səfəri gözlənilir.

"Rusiyanın müdafiə naziri cənab Belousov üçün açıq dəvətimiz var. Onu bu ilin oktyabr ayında Bakıya səfərə gözləyirik", – deyə Rəhman Mustafayev qeyd edib.

Diplomat vurğulayıb ki, bu səfər iki ölkə arasında əməkdaşlığın inkişafı baxımından mühüm əhəmiyyət daşıyır.

Onun sözlərinə görə, müdafiə sahəsində qarşılıqlı fəaliyyət həssas istiqamətlərdən biri hesab olunur və bu sahədə əlaqələrin intensivliyi Azərbaycan-Rusiya münasibətlərinin ümumi vəziyyətinə də təsir göstərir.

Səfir qeyd edib ki, hərbi sahədə əməkdaşlığın daha da genişləndirilməsi ikitərəfli münasibətlərə əlavə töhfə verə bilər.