ABŞ-nin Miçiqan ştatında baş verən dəhşətli hadisə ölkədə ciddi rezonans doğurub. Fərdi yaşayış evində baş vermiş yanğından sonra səkkiz nəfərin, o cümlədən altı azyaşlının meyiti aşkarlanıb.

Realmedia.info xəbər verir ki, NBC telekanalının yaydığı məlumata görə, Ottava dairəsinin polis kapitanı Ceykob Sparks ölən uşaqların yaşlarının 5-15 arasında olduğunu bildirib.

İlkin araşdırmalar zamanı meyitlərdən bəzilərində güllə yaraları aşkar edilib. Hüquq-mühafizə orqanları güllə yarası alan şəxslərin dəqiq sayını hələ açıqlamayıb.

Polisin məlumatına əsasən, hadisə ilə bağlı əsas ehtimallardan biri kütləvi qətl və daha sonra intihar hadisəsinin baş verməsidir. Bu səbəbdən istintaq çərçivəsində hazırda kənar şübhəli şəxslərin axtarışı aparılmır.

Hadisənin başvermə səbəblərinin tam müəyyənləşdirilməsi istiqamətində araşdırmalar davam etdirilir.