İyulun 23-də Azərbaycanın xarici işlər naziri Ceyhun Bayramov Rusiya Federasiyası Prezidentinin köməkçisi, Prezidentin iqlim məsələləri üzrə xüsusi nümayəndəsi Ruslan Edelgeriyevi qəbul edib.

Realmedia.info xəbər verir ki, bu barədə Azərbaycan Xarici İşlər Nazirliyi məlumat yayıb.

Bildirilib ki, görüş zamanı Azərbaycan ilə Rusiya arasında iqlim dəyişikliyi ilə mübarizə sahəsində əməkdaşlığın genişləndirilməsi, COP prosesi, eləcə də qarşılıqlı maraq doğuran regional və beynəlxalq məsələlər ətrafında fikir mübadiləsi aparılıb.

Nazir Ceyhun Bayramov COP29-a sədrliyi dövründə Azərbaycanın əldə etdiyi təcrübə və mühüm nəticələr barədə ətraflı məlumat verib. O, həmçinin ölkəmizin COP31-in sədrliyini həyata keçirəcək Avstraliya və tədbirə ev sahibliyi edəcək Türkiyə ilə bu istiqamətdə sıx əməkdaşlıq etdiyini diqqətə çatdırıb.

Görüşdə Xəzər dənizi ilə bağlı ikitərəfli əməkdaşlıq məsələləri də geniş müzakirə olunub. Tərəflər Xəzər dənizi üzrə yaradılmış Birgə İşçi Qrupunun fəaliyyətinin daha da intensivləşdirilməsinin vacibliyini vurğulayıblar.

Bununla yanaşı, Xəzər dənizinin su ehtiyatlarının və unikal ekosisteminin qorunmasının əhəmiyyəti qeyd olunub. Bu istiqamətdə, xüsusilə kənd təsərrüfatı sahəsində innovativ texnologiyaların tətbiqi, ekoloji layihələrin həyata keçirilməsi və birgə təşəbbüslərin reallaşdırılmasının vacibliyi diqqətə çatdırılıb.

Görüş zamanı tərəflər qarşılıqlı maraq doğuran digər ikitərəfli məsələlər barədə də fikir mübadiləsi aparıblar.