Azərbaycan Respublikasının Prezidenti İlham Əliyev aprelin 2-də Türkiyə Respublikasının vitse-prezidenti Cevdet Yılmazın başçılıq etdiyi nümayəndə heyətini qəbul edib.
Realmedia.info xəbər verir ki, görüş zamanı Cevdet Yılmaz Türkiyə Prezidenti Rəcəb Tayyib Ərdoğanın salamlarını dövlət başçısına çatdırıb. Prezident İlham Əliyev salamlara görə minnətdarlığını bildirib və onun da salamlarını Türkiyə liderinə çatdırmağı xahiş edib.

Görüşdə Türkiyənin hər zaman Azərbaycanın yanında olduğu vurğulanıb və bunun Şuşa Bəyannaməsinin əsas prinsiplərindən biri olduğu qeyd edilib. Prezident İlham Əliyev də Azərbaycanın hər zaman Türkiyənin yanında olduğunu bildirib.

Tərəflər Azərbaycanla Türkiyə arasında qardaşlıq və strateji müttəfiqlik münasibətlərinin bütün istiqamətlər üzrə uğurla inkişaf etdiyini vurğulayıblar. Müxtəlif səviyyələrdə qarşılıqlı səfərlərin münasibətlərin daha da genişlənməsinə töhfə verdiyi diqqətə çatdırılıb.

Söhbət zamanı Bakıda Türk Dövlətləri Təşkilatına üzv ölkələrin hökumət başçılarının və vitse-prezidentlərinin görüşünün əhəmiyyəti qeyd olunub, bu tədbirin təşkilat çərçivəsində əməkdaşlığın gücləndirilməsi baxımından önəmli platforma olduğu bildirilib.

Cevdet Yılmaz toplantıda Şimali Kipr Türk Cümhuriyyətinin baş nazirinin iştirakını məmnunluqla qeyd edərək, buna görə Azərbaycan tərəfinə təşəkkürünü bildirib.

Qonaq, həmçinin ötən il Qəbələdə keçirilən Türk Dövlətləri Təşkilatının Dövlət Başçıları Şurasının 12-ci Zirvə Görüşünün yüksək səviyyədə təşkil olunduğunu vurğulayaraq, Azərbaycanın təşkilata sədrliyinin uğurlu olduğunu qeyd edib.

Görüş zamanı Azərbaycanla Türkiyə arasında ikitərəfli əməkdaşlığın perspektivləri, regional vəziyyət və qarşılıqlı maraq doğuran digər məsələlər ətrafında fikir mübadiləsi aparılıb.