Azərbaycan Respublikasının Prezidenti İlham Əliyev fevralın 23-də İran İslam Respublikasının yol və şəhərsalma naziri, Azərbaycan–İran İqtisadi Əməkdaşlıq üzrə Hökumətlərarası Birgə Komissiyanın həmsədri Fərzanə Sadiqin başçılıq etdiyi nümayəndə heyətini qəbul edib.

Görüş zamanı Azərbaycan ilə İran arasında əməkdaşlığın müxtəlif istiqamətlərdə inkişafından məmnunluq ifadə olunub. Dövlət başçısı iki ölkə arasında münasibətlərin genişləndirilməsi üçün qarşılıqlı səfərlərin və yüksək səviyyəli təmasların əhəmiyyətini vurğulayıb.

Söhbət zamanı iqtisadi-ticari əlaqələrin genişləndirilməsi, nəqliyyat-logistika sahəsində əməkdaşlıq və birgə infrastruktur layihələrinin icrası məsələləri müzakirə edilib. Xüsusilə, Şimal–Cənub nəqliyyat dəhlizi çərçivəsində görülən işlərin əhəmiyyəti qeyd olunub.

Fərzanə Sadiq göstərilən qəbula görə minnətdarlığını bildirib, İran rəhbərliyinin salamlarını Prezidentə çatdırıb və ölkələr arasında tarixi və dostluq münasibətlərinin bundan sonra da inkişaf edəcəyinə əminliyini ifadə edib.