Heydər Əliyev Fondunun vitse-prezidenti, IDEA İctimai Birliyinin təsisçisi və rəhbəri Leyla Əliyevanın təşəbbüsü ilə Dübəndi yaşayış sahəsində ekoloji aksiya təşkil olunub.

Realmedia.info xəbər verir ki, IDEA İctimai Birliyinin təşkilatçılığı və Fövqəladə Hallar Nazirliyinin dəstəyi ilə keçirilən aksiya zamanı sahilboyu əraziyə yayılmış neft tullantılarının və neftlə çirklənmiş qalıqların təmizlənməsi işləri həyata keçirilib.

Aksiyada iştirak edən şəxslərin təhlükəsizliyinin təmin edilməsi məqsədilə əvvəlcədən onlara neft tullantıları ilə düzgün davranış qaydaları, fərdi mühafizə vasitələrindən istifadə və fövqəladə hallar zamanı görüləcək tədbirlərlə bağlı məlumat verilib.

Təmizlik işləri nəticəsində toplanan neft tullantıları ətraf mühitə zərər verməməsi üçün müəyyən olunmuş qaydada zərərsizləşdirilməsi məqsədilə aidiyyəti üzrə təhvil verilib.

Ekoloji aksiyanın keçirilməsi ətraf mühitin qorunması və Xəzər sahillərinin təmiz saxlanılması istiqamətində mühüm addımlardan biri kimi qiymətləndirilir.