Bakıda çoxmərtəbəli yaşayış binalarının tikintisi ilə məşğul olan şirkət inzibati məsuliyyətə cəlb edilib.

Məlumata görə, "Teymuroğlu Construction" Mənzil Tikinti Kooperativində (MTK) Əmək və Əhalinin Sosial Müdafiəsi Nazirliyi yanında Əmək Müfəttişliyi Xidmətinin Bakı şəhər İdarəsi tərəfindən araşdırma aparılıb.

Araşdırma zamanı MTK-nın əməkdaşı Ə.Əsgərxanovun iş fəaliyyəti zamanı bədbəxt hadisə nəticəsində vəfat etdiyi müəyyən edilib.

Təhqiqat zamanı məlum olub ki, işçi istehsalatda bədbəxt hadisələr və peşə xəstəlikləri nəticəsində əmək qabiliyyətinin itirilməsi hallarından icbari sığorta ilə təmin edilməyib.

Bununla bağlı şirkətin İnzibati Xətalar Məcəlləsinin müvafiq maddəsinin tələblərini pozduğu müəyyən edilib.

MTK nümayəndəsi bildirib ki, əmək müqaviləsi və sığorta məsələsi ilə bağlı texniki və təşkilati problemlər yaşanıb. O, həmçinin hadisənin ehtiyatsızlıq nəticəsində baş verdiyini və şirkət tərəfindən mərhum işçinin ailəsinə yardım göstərildiyini qeyd edib.

Nərimanov Rayon Məhkəməsinin qərarı ilə "Teymuroğlu Construction" MTK 5 min manat məbləğində cərimələnib.