Bakının Səbail rayonunda çoxmərtəbəli binada yanğın hadisəsi baş verib.

Realmedia.info xəbər verir ki, yanğın Bakı şəhəri, Səbail rayonu, Nigar Rəfibəyli küçəsi, 26 ünvanında yerləşən binada qeydə alınıb.

Fövqəladə Hallar Nazirliyinin (FHN) Dövlət Yanğından Mühafizə Xidmətinin qüvvələri tərəfindən həyata keçirilən tədbirlər nəticəsində yanğın genişlənməsinə imkan verilmədən tam söndürülüb.

Yanğın nəticəsində binanın birinci mərtəbəsində qeyri-yaşayış sahəsində fəaliyyət göstərən müxtəlif təyinatlı 11 obyektdən 3-nün yanar konstruksiyaları ümumilikdə 120 kvadratmetr sahədə yanıb.

Bundan əlavə, binanın ikinci mərtəbəsində yerləşən vətəndaşa məxsus ümumi sahəsi 120 kvadratmetr olan üçotaqlı mənzilin döşəməsi yanğından zərər görüb.

Yanğın zamanı binanın böyük hissəsi alovdan mühafizə edilib.

Təhlükəsizlik tədbirləri çərçivəsində bina sakinləri FHN əməkdaşları tərəfindən təhlükəsiz əraziyə təxliyə olunublar.

Hadisə ilə bağlı müvafiq araşdırma aparılır.