Müdafiə Nazirliyinin "İstirahət evi"nin rüşvət almaqda təqsirləndirilən sabiq rəisi İlham Haqverdiyevin barəsində çıxarılan məhkəmə hökmü apellyasiya instansiyasında dəyişdirilib.

Realmedia.info xəbər verir ki, Bakı Apellyasiya Məhkəməsində prokurorluğun verdiyi apellyasiya protestinə baxılıb və protest qismən təmin edilib.

Məhkəmənin qərarına əsasən, İlham Haqverdiyev barəsində əvvəllər təyin edilmiş 15 min manat məbləğində cərimə cəzası ləğv olunub. Onun barəsində 8 il müddətinə azadlıqdan məhrumetmə cəzası təyin edilib.

Bununla yanaşı, Azərbaycan Respublikası Cinayət Məcəlləsinin 70-ci maddəsi (Şərti məhkum etmə) tətbiq olunaraq, iki il sınaq müddəti müəyyən edilib və təyin olunmuş cəza şərti hesab olunub.

Qeyd edək ki, Bakı Hərbi Məhkəməsinin əvvəlki hökmünə əsasən, İlham Haqverdiyev 15 min manat cərimə olunmuş və həbsdə saxlanıldığı müddət başa çatdıqdan sonra məhkəmə zalından azadlığa buraxılmışdı.

Xatırladaq ki, Müdafiə Nazirliyinin keçirdiyi daxili araşdırmalar zamanı "İstirahət evi"nin rəisi, mayor İlham Haqverdiyevin qanun pozuntularına yol verdiyi müəyyən edilmiş, toplanmış materiallar hüquqi qiymət verilməsi üçün Hərbi Prokurorluğa göndərilmişdi.

Daha sonra məhkəmənin qərarı ilə onun barəsində 2 ay 20 gün müddətinə həbs qətimkan tədbiri seçilmişdi.

İlham Haqverdiyev Azərbaycan Respublikası Cinayət Məcəlləsinin 311-ci maddəsi (rüşvət alma) ilə ittiham olunur.