Külli miqdarda dövlət vəsaitini talamaqda təqsirləndirilən Məhərrəm Əliyev, Qurbanxan İsgəndərov və Yaşar Heydərovun cinayət işi üzrə məhkəmə araşdırması başa çatıb.

Realmedia.info xəbər verir ki, Lənkəran Ağır Cinayətlər Məhkəməsində hakim Ayşən Vəliyevanın sədrliyi ilə keçirilən prosesdə təqsirləndirilən şəxslər barəsində hökm elan olunub.

Məhkəmənin qərarına əsasən, Məhərrəm Əliyev iki il sınaq müddəti təyin edilməklə şərti cəzaya məhkum edilib. Qurbanxan İsgəndərova iki il bir ay beş gün müddətinə həbs, Yaşar Heydərova isə iki il altı ay müddətinə azadlığın məhdudlaşdırılması cəzası verilib.

Qurbanxan İsgəndərovun ev dustaqlığında keçirdiyi müddət cəzasına hesablanıb və onun cəzasını çəkmiş hesab edilməsi barədə qərar qəbul olunub. Eyni zamanda, hökm qanuni qüvvəyə minənədək onun barəsində "başqa yerə getməmək haqqında iltizam" qətimkan tədbiri seçilib.

Məhkəmə materiallarına əsasən, təqsirləndirilən şəxslərin dövlətə vurduğu ziyanın böyük hissəsi ödənilib. İş üzrə ümumi ziyanın məbləği 66 min 472 manat 17 qəpik təşkil edib.

İttihama görə, Məhərrəm Əliyev Masallı rayon MKTİB-nin rəisi işlədiyi dövrdə baş mühasib Qurbanxan İsgəndərovla əlbir olaraq vəzifə səlahiyyətlərindən istifadə edib, "Məhəmməd-2022" MMC-nin direktoru Yaşar Heydərovun köməkliyi ilə büdcə vəsaitlərinin mənimsənilməsində iştirak edib. Həmçinin rəsmi sənədlərə bilə-bilə yalan məlumatlar daxil etməklə vəzifə saxtakarlığı törətməkdə ittiham olunub.

Faktla bağlı Cinayət Məcəlləsinin mənimsəmə, vəzifə səlahiyyətlərindən sui-istifadə və vəzifə saxtakarlığı maddələri ilə ittihamlar irəli sürülüb.