Sosial şəbəkələrdə kommunist ideologiyasının təbliğinə dair materiallar yaymaqda və SSRİ bayraqları ilə yürüş keçirməyə cəhd göstərməkdə ittiham olunan şəxslərin cinayət işi üzrə məhkəmə prosesi yekunlaşıb.

Realmedia.info xəbər verir ki, Nizami Rayon Məhkəməsində keçirilən prosesdə hökm elan olunub.

Məhkəmənin hökmü ilə İbrahim Əsədli 2 il, Abdulla İbrahimli 2 il, Elçin Bayramlı 1 il 6 ay, Mehman Zeynalov isə 1 il 6 ay müddətinə azadlıqdan məhrum edilib.

Qeyd edək ki, ötən ilin noyabr ayında sosial şəbəkələrdə bir qrup şəxsin SSRİ bayraqları ilə yürüş keçirməyə cəhd göstərməsini əks etdirən videogörüntülər yayılıb.

Daxili İşlər Nazirliyinin keçirdiyi tədbirlər nəticəsində yürüşün təşkilatçıları olduğu bildirilən Abdulla İbrahimli, İbrahim Əsədli, Elçin Bayramlı və Mehman Zeynalov müəyyən edilərək saxlanılıblar.

Məhkəmənin qərarı ilə onların barəsində 3 ay müddətinə həbs qətimkan tədbiri seçilib.

Şəxslər Azərbaycan Respublikası Cinayət Məcəlləsinin 233-cü maddəsi – ictimai qaydanın pozulmasına səbəb olan hərəkətləri təşkil etmə və ya bu cür hərəkətlərdə fəal iştirak etmə maddəsi ilə ittiham olunublar.

Məhkəmə araşdırmalarının yekununda təqsirləndirilən şəxslər barəsində yuxarıda qeyd olunan hökmlər çıxarılıb.