Dövlət əleyhinə çağırışlarda təqsirləndirilən Ərəstun Oruclunun cinayət işi üzrə məhkəmənin yekun prosesi keçirilib.

Bu gün Bakı Ağır Cinayətlər Məhkəməsində hakim Babək Pənahovun sədrliyi ilə keçirilən prosesdə qiyabi hökm oxunub. Hökmə əsasən, Ərəstun Oruclu 8 il müddətinə azadlıqdan məhrum edilib.

Ərəstun Oruclu barəsində Cinayət Məcəlləsinin 281.2-ci maddəsi (Dövlət əleyhinə yönələn açıq çağırışlar, təkrar və ya bir qrup şəxs tərəfindən törədildikdə) ilə ittiham irəli sürülüb. O, istintaqdan qaçaraq Azərbaycan hüdudlarından kənarda gizləndiyi üçün barəsində axtarış elan olunmuşdu. Ötən il 23 fevralda Binəqədi Rayon Məhkəməsi tərəfindən qiyabi həbs qətimkan tədbiri seçilmişdi.

Sentyabrın 18-də ittihama əlavələr edilərək Ərəstun Oruclu Cinayət Məcəlləsinin 220.2-ci və 281.2-ci maddələri ilə təqsirləndirilən şəxs qismində cəlb olunub.

Məlumata görə, o, 2023-cü il 4 yanvarda “YouTube” platformasında yaratdığı kanallarda bir qrup şəxslə birgə Azərbaycanda qanuni hakimiyyətə qarşı zor tətbiqini təşviq edən açıq çağırışlar edib və yayıb.