Azərbaycan Respublikasının Prezidenti İlham Əliyev "Dövlət satınalmaları haqqında" Qanunda dəyişiklik edilməsi barədə qanunu imzalayıb.

Dəyişikliklərə əsasən, qeyri-rezident hüquqi və fiziki şəxslərin dövlət satınalmalarında icra və (və ya) avans təminatı təqdim etməsi ilə bağlı yeni mexanizm müəyyən edilib.

Yeni qaydalara görə, qeyri-rezident təchizatçılar satınalma təklifləri ilə birlikdə icra və ya avans təminatını təqdim etmək öhdəliyindən azad olunmaları üçün satınalma komissiyasına əsaslandırılmış müraciət edə biləcəklər.

Həmçinin, bir mənbədən satınalma metodu tətbiq edilərkən satınalma komissiyası qeyri-rezident təchizatçının bu təminatları təqdim etməsinin mümkün olmadığını müəyyən etdikdə, satınalan təşkilat 10 iş günü ərzində müvafiq dövlət orqanına müraciət edəcək.

Müvafiq dövlət qurumu isə nəzarət orqanının təklifləri əsasında 20 iş günü müddətində xarici təchizatçının icra və (və ya) avans təminatından azad edilməsi və ya bu müraciətin rədd olunması barədə qərar qəbul edəcək.

Qanuna əsasən, təchizatçının təminatdan azad edilməsi barədə qərar qəbul edildiyi tarixdən etibarən 12 ay ərzində eyni satınalan təşkilat tərəfindən həmin təchizatçıdan eyni predmet üzrə satınalma həyata keçirilərsə, əlavə qərarın alınmasına ehtiyac olmayacaq.

Bundan başqa, Prezident İlham Əliyev "Dövlət satınalmaları haqqında" 14 iyul 2023-cü il tarixli Qanunun tətbiqi ilə bağlı 19 avqust 2023-cü il tarixli Fərmanda da dəyişiklik edib.

Yeni Fərmana əsasən, Nazirlər Kabineti üç ay müddətində qeyri-rezident hüquqi və fiziki şəxslərin icra və (və ya) avans təminatından azad olunması ilə bağlı satınalan təşkilatların müraciətlərinə baxılması və qərarların qəbul edilməsi qaydasını təsdiq etməli, həmçinin qanundan irəli gələn digər məsələlərin həllini təmin etməlidir.