“Diplomatik xidmət haqqında” Qanuna təklif edilən dəyişikliklərə əsasən, diplomatik xidmət əməkdaşlarının sosial təminatı ilə bağlı yeni müddəalar nəzərdə tutulur.

Realmedia.info xəbər verir ki, layihəyə əsasən, diplomatik xidmətə vəfat etdikdə, eləcə də məhkəmənin qanuni qüvvəyə minmiş qərarı ilə xəbərsiz itkin düşmüş və ya ölmüş elan edildikdə xitam verilərsə, əməkdaşın vərəsələrinə ortaaylıq dövlət məvacibinin dörd misli həcmində müavinət ödəniləcək.

Bundan başqa, diplomatik xidmətə müddətli həqiqi hərbi xidmətə və ya alternativ xidmətə çağırılma ilə əlaqədar xitam verildiyi halda əməkdaşa ortaaylıq dövlət məvacibinin üç misli miqdarında müavinət veriləcək.

Layihədə həmçinin qeyd olunub ki, diplomatik xidmət orqanının ləğvi istisna olmaqla, müddətli həqiqi hərbi xidmətə çağırılanadək diplomatik vəzifədə çalışan şəxslər hərbi xidmətdən tərxis olunduqdan sonra ən gec 60 təqvim günü ərzində əvvəlki vəzifəsinə qayıtmaq üçün müraciət etdikdə, həmin orqanda əvvəlki və ya analoji vəzifəyə təyin olunacaqlar.