Milli Məclisdə “Yol hərəkəti haqqında” qanuna edilən son dəyişiklik sürücülər arasında geniş müzakirələrə səbəb olub. Bir çox sürücülər qəbul edilən yeniliyin mahiyyətini tam şəkildə anlamadıqlarını bildirirlər.

Sürücülərin sözlərinə görə, dəyişiklikdə nəqliyyat vasitəsinin mühafizə olunan duracağa aparılmasına səbəb olan inzibati işə xitam verildiyi halda, avtomobilin duracağa aparılması və saxlanılması üçün ödənilən məbləğin sahibinə qaytarılacağı qeyd olunur. Onlar isə bu qaydanın əvvəldən də mövcud olduğunu deyərək, yeniliyin nədən ibarət olduğunu soruşurlar.

Bəzi sürücülər isə duracaq üçün ödənişin necə hesablanacağı və hansı qaydada geri qaytarılacağı məsələsinin onlar üçün tam aydın olmadığını bildiriblər.
Məsələ ilə bağlı açıqlama verən ekspert Əziz Talıbov bildirib ki, nəqliyyat vasitəsinin cərimə meydançasına yerləşdirilməsi İnzibati Xətalar Məcəlləsinin 96.1-ci maddəsində nəzərdə tutulur və bu norma qanunvericilikdə açıq şəkildə göstərilib.

Ekspertin sözlərinə görə, əvvəlki qaydalara əsasən avtomobil cərimə meydançasına gətirilən andan etibarən saxlanma vaxtı hesablanırdı və növbəti gün artıq bir gün kimi qiymətləndirilərək ödəniş tələb olunurdu. Yeni dəyişikliklər isə bu hesablanma qaydasını müəyyən qədər fərqli şəkildə tənzimləyir.

“Yeni qaydalara görə, nəqliyyat vasitəsi gətirildiyi gün saat 00:00-a qədər saxlanıla bilər və bu müddət üçün ödəniş tələb olunmur. Saat 00:00-dan sonra isə bir günün saxlanma haqqı hesablanır”, – deyə Ə.Talıbov izah edib.

O əlavə edib ki, nəqliyyat vasitəsi qayda pozuntusuna görə qanunauyğun şəkildə cərimə meydançasına gətirilibsə, inzibati cərimə ödənildikdən və ya səbəb aradan qaldırıldıqdan sonra avtomobil dərhal sahibinə qaytarılır. Bu qayda əvvəlki qanunvericilikdə də mövcud olub və hazırda da dəyişməz qalır.

Ekspertin sözlərinə görə, daha vacib məqam ondan ibarətdir ki, əgər sonradan aparılan araşdırma nəticəsində nəqliyyat vasitəsinin cərimə meydançasına aparılmasının qanunsuz olduğu müəyyən edilərsə, bu zaman avtomobil sahibinə qaytarılır və saxlanma müddəti üçün ödənilmiş məbləğ də geri verilir. Hətta sürücü inzibati cərimə ödəyibsə və sonradan məhkəmə qərarı ilə işə xitam verilərsə, ödənilmiş cərimə də ona qaytarılır.

Qeyd edək ki, “Yol hərəkəti haqqında” qanuna edilən dəyişiklik Milli Məclisdə üçüncü oxunuşda qəbul olunub. Dəyişiklikdə əsas məqamlardan biri nəqliyyat vasitəsinin mühafizə olunan duracağa aparılmasına səbəb olan iş bağlandıqda, avtomobilin duracağa aparılması və saxlanılması üçün ödənilmiş məbləğin sahibinə qaytarılması məsələsinin qanunda ayrıca qeyd edilməsidir.