Bakıda keçirilən güləş üzrə U17 dünya çempionatında bu gün növbəti yarış gününə start verilir.

Milli Gimnastika Arenasında təşkil olunan mundialın növbəti günündə Azərbaycanın daha beş sərbəst güləşçisi medal uğrunda mübarizəyə qoşulacaq.

Təsnifat mərhələsində 71 kq çəki dərəcəsində Tunar Quliyev Qazaxıstan təmsilçisi Adilet Risbayla, 92 kq-da isə Elgün Kərimli Hindistan idmançısı Sakşam Fnu ilə qarşılaşacaq.

1/8 final mərhələsində isə 48 kq-da Tunar Həsənov Bolqarıstan təmsilçisi Radoslav Velikov və ya Monqolustan idmançısı Ariun Erdenetuqla, 51 kq-da İbrahim Həsənov Kanada güləşçisi Quarav Bahi və ya Gürcüstan təmsilçisi Giorgi Narimanidze ilə üz-üzə gələcək.

60 kq çəki dərəcəsində mübarizə aparacaq Elcan Həsənovun rəqibi isə Macarıstan idmançısı Balaş Hideq və ya Polşa təmsilçisi Vitold Pavlik olacaq.

Xatırladaq ki, ötən gün yarışa başlayan Abbas Şəfiyev (55 kq), Rəşid Nazarov (65 kq), Hakim Tağıyev (110 kq), Hüseyn Rzazadə (48 kq) və Nihad Süleymanlı (80 kq) müxtəlif mərhələlərdə məğlub olublar. Onlardan yalnız Hüseyn Rzazadə bürünc medal uğrunda mübarizə aparmaq şansını qoruyub saxlayıb və təsəlliverici görüşdə Amirali İbrahim Fazla ilə qarşılaşacaq.

Qeyd edək ki, avqustun 2-dək davam edəcək U17 dünya çempionatında 60-dan çox ölkədən 700-ə yaxın yeniyetmə güləşçi iştirak edir. Azərbaycan yarışda 29 idmançı ilə təmsil olunur.