Samux rayonunda doğuş üçün xəstəxanaya müraciət edən hamilə qadının xidmət göstərilmədiyi iddia olunur. Nəticədə ailə qadını "Muravey" motosikleti ilə Gəncəyə çatdırmalı olub.

Realmedia.info xəbər verir ki, hadisə ilə bağlı məlumat Xəzər TV-də yayımlanıb.

Altıncı övladını gözləyən Raisa Mustafayevanı həyat yoldaşı Emin Mustafayev doğuş üçün Samux Rayon Mərkəzi Xəstəxanasına aparıb. Ailənin iddiasına görə, qadın əvvəlcə doğuşa hazırlanıb, lakin sonradan tibbi xidmət dayandırılıb və onun Gəncə Şəhər Perinatal Mərkəzinə aparılması tövsiyə edilib.

Emin Mustafayev bildirib ki, xəstəxana tərəfindən onları Gəncəyə yönləndirsələr də, təcili tibbi yardım avtomobili ayrılmayıb. Bu səbəbdən həyat yoldaşını "Muravey" motosikleti ilə Gəncəyə çatdırmağa məcbur olub.

Raisa Mustafayeva da bildirib ki, xəstəxanada ilkin tibbi hazırlıq görülsə də, sonradan prosedurlar dayandırılıb və o, başqa tibb müəssisəsinə göndərilib.

Ailənin sözlərinə görə, dünyaya gələn körpəni də sonradan həmin motosikletlə evə aparıblar.

Hadisə ilə bağlı aidiyyəti qurumların mövqeyi hələlik açıqlanmayıb.