Ümumdünya Şəhərsalma Forumunun 13-cü sessiyası (WUF13) ilə əlaqədar Tibbi Ərazi Bölmələrini İdarəetmə Birliyi tabeliyində fəaliyyət göstərən tibb müəssisələrində xidmətlərin fasiləsiz təşkili üçün hazırlıq işləri görülüb.
Bu barədə qurum məlumat yayıb.

Bildirilib ki, tədbir dövründə xüsusilə 4 tibb müəssisəsi, o cümlədən Respublika Təcili və Təxirəsalınmaz Tibbi Yardım Mərkəzi gücləndirilmiş iş rejimində fəaliyyət göstərəcək.

Mümkün tibbi ehtiyacların qarşılanması məqsədilə “Yeni Klinika”nın təcili yardım, uşaq təcili yardım, reanimasiya və əməliyyatxana şöbələri tam hazır vəziyyətə gətirilib. Həmçinin Sabunçu Tibb Mərkəzinin Məhəmmədi Modul Tipli Xəstəxanası, Mərkəzi Neftçilər Xəstəxanası və Kliniki Tibbi Mərkəzdə müvafiq çarpayı fondları ayrılıb.

Təcili tibbi yardım xidmətinin gücləndirilməsi üçün 75 briqada və 35 təcili yardım avtomobili səfərbər edilib. Eyni zamanda tədbir məkanları və hotellərdə briqadalar 24/7 rejimdə xidmət göstərəcək.

Bundan əlavə, tibbi personal üçün ilkin və təkmil həyat dəstəyi üzrə təlimlər keçirilib, həmçinin könüllülərə ilkin tibbi yardım bacarıqları öyrədilib.

Qeyd edək ki, Ümumdünya Şəhərsalma Forumu XIII Sessiya çərçivəsində fövqəladə hallara operativ reaksiya və tibbi xidmətin fasiləsiz təmin olunması əsas prioritetlərdən biri kimi müəyyən edilib.