17–22 may tarixlərində Bakıda keçiriləcək Ümumdünya Şəhərsalma Forumunun (WUF13) 13-cü sessiyası ilə əlaqədar xüsusi nəqliyyat tədbirləri həyata keçiriləcək.

Bununla bağlı Bakı Olimpiya Stadionu ərazisinə rahat və fasiləsiz gediş-gəlişi təmin etmək üçün Koroğlu Nəqliyyat Qovşağı gücləndirilmiş rejimdə fəaliyyət göstərəcək.

Məlumata əsasən, 14 may saat 06:00-dan etibarən “K1” xüsusi servis avtobusu 24/7 rejimində Bakı Olimpiya Stadionu ilə “Koroğlu” Nəqliyyat Qovşağı arasında sərnişin daşımalarını həyata keçirəcək.

Servis avtobusu “Koroğlu” Nəqliyyat Qovşağında yerləşən Avtobus Nəqliyyat Mübadilə Mərkəzinin “4A” perronundan hərəkət edəcək.

Qeyd edilib ki, “K1” servisindən yalnız WUF13 iştirakçıları ödənişsiz istifadə edə biləcəklər. Akkreditasiyadan keçən iştirakçılar və ya qeydiyyat təsdiqini göstərən sənəd təqdim edən şəxslər nəqliyyat xidmətindən pulsuz yararlana biləcəklər.

Bu xüsusi nəqliyyat xətti forum iştirakçılarının tədbir məkanına daha təhlükəsiz, komfortlu və çevik şəkildə çatmasına imkan yaradacaq.