Cəlilabad rayonunda baş verən ağır yol-nəqliyyat hadisəsi zamanı xəsarət alan şəxslərin vəziyyəti məlum olub.

Realmedia.info xəbər verir ki, bu barədə Oxu.Az-ın sorğusuna cavab olaraq Tibbi Ərazi Bölmələrini İdarəetmə Birliyi (TƏBİB) məlumat yayıb.

Bildirilib ki, qəza nəticəsində xəsarət alan dörd nəfər – iki kişi, bir qadın və bir azyaşlı avqustun 7-də Cəlilabad Rayon Mərkəzi Xəstəxanasının Təcili tibbi yardım şöbəsinə hospitalizasiya olunub.

Məlumata əsasən, bədənin müxtəlif nahiyələrinin travmaları diaqnozu qoyulan yaralılara zəruri tibbi yardım göstərilib. Həkim müayinəsindən sonra onların vəziyyəti qənaətbəxş qiymətləndirildiyindən ambulator müalicə üçün evə buraxılıblar.

Qəzanın təfərrüatına gəlincə, hadisə gecə saat 02:00 radələrində rayonun Soltankənd kəndi ərazisində baş verib. 77-QS-771 dövlət qeydiyyat nişanlı BMW markalı minik avtomobili sürücü Elbrus Fərman oğlu Qafarovun idarəetməsindən çıxaraq aşıb.

İlkin məlumata görə, hadisəyə sürücünün yolu yaxşı tanımaması və döngədə idarəetməni itirməsi səbəb olub. Avtomobil təxminən 50 metr hündürlükdən aşaraq yol kənarına düşüb.

Qəza zamanı Yardımlı rayon sakini, 1980-ci il təvəllüdlü Elbrus Fərman oğlu Qafarov, Sumqayıt şəhər sakinləri – 2003-cü il təvəllüdlü Zəhra Əlizamin qızı Qafarova, 2012-ci il təvəllüdlü Samir Seymur oğlu Qafarov və 2025-ci il təvəllüdlü Məryəm Əmir qızı Məmmədova müxtəlif dərəcəli xəsarətlər alıblar.

Əldə olunan məlumata görə, xəsarət alanlar sürücünün ailə üzvləri deyil, onun yaxın qohumları – qardaşının həyat yoldaşı və nəvələri olublar. Onların xəsarətlərinin ciddi olmadığı bildirilir.

Faktla bağlı aidiyyəti qurumlar tərəfindən araşdırma aparılır.