Göygöl rayonunda baş verən yol-nəqliyyat hadisəsi zamanı xəsarət alan şəxslərin vəziyyəti açıqlanıb.

TƏBİB-dən verilən məlumata görə, qəza mayın 11-də gecə saat 02:20 radələrində qeydə alınıb. Hadisə nəticəsində müxtəlif bədən xəsarətləri alan beş nəfər kişi Göygöl Rayon Mərkəzi Xəstəxanası-nın Təcili tibbi yardım şöbəsinə hospitalizasiya olunub.

Bildirilib ki, yaralılara ilkin tibbi yardım göstərildikdən sonra onlar daha ixtisaslı tibbi xidmət almaqları üçün Gəncə Şəhər Birləşmiş Xəstəxanası-nın nəzdində fəaliyyət göstərən Z.Məmmədov adına xəstəxanaya təxliyə ediliblər.
Həkimlərin müdaxiləsindən sonra yaralıların vəziyyətinin stabil olduğu müəyyən edilib və onlar ambulator müalicə üçün evə buraxılıblar.

Məlumata görə, qəza rayon mərkəzində yerləşən küçələrdən birində baş verib. İdarəetmədən çıxan avtomobil yol kənarındakı işıq dirəyinə çırpılıb.

Hadisə zamanı xəsarət alanların 2000-ci il təvəllüdlü Ə.İsmayılov, 2001-ci il təvəllüdlü C.Bəylərov, 2003-cü il təvəllüdlü E.Həsənov, 2006-cı il təvəllüdlü E.Quliyev və 2001-ci il təvəllüdlü V.Bəylərov olduğu bildirilib.

Faktla bağlı hüquq-mühafizə orqanları tərəfindən araşdırma aparılır.