Oğuz rayonunda aprelin 7-də baş verən yol-nəqliyyat hadisəsi zamanı beş nəfər xəsarət alıb.

Realmedia.info xəbər verir ki, saat 03:30-da baş vermiş hadisə nəticəsində üç qadın və iki kişi Oğuz Rayon Mərkəzi Xəstəxanasının Təcili tibbi yardım şöbəsinə hospitalizasiya olunub.

Yaralılara döş qəfəsinin travması, başın və bədənin müxtəlif nahiyələrinin əzilmiş, açıq yaraları diaqnozları qoyulub və zəruri tibbi yardım göstərilib.

Vəziyyətləri qənaətbəxş olan 1983-cü il, 1992-ci il və 2011-ci təvəllüdlü qadınlar ambulator müalicə üçün evə buraxılıblar. 1965-ci il və 1976-cı il təvəllüdlü kişilər isə daha ixtisaslı tibbi xidmət üçün Qəbələ Rayon Mərkəzi Xəstəxanasına göndəriliblər.

Qəza Oğuz rayonunun Sincan kəndi ərazisində baş verib. Bakıdan toy mərasimindən qayıdan Sirapil Yunisov 90-ML-835 dövlət nömrə nişanlı "Mitsubishi" markalı avtomobilə idarəetməni itirib və nəqliyyat vasitəsi aşıb. Hadisə zamanı 1976-cı il təvəllüdlü Otabek Yunisov və 19 yaşlı qızı Asmin Yunisova xəsarət alıblar. Onların xəsarətləri yüngül qiymətləndirilir.

Faktla bağlı araşdırmalar davam etdirilir.