Muğanlı-İsmayıllı avtomobil yolunda ağır yol-nəqliyyat hadisəsi baş verib.

Hadisə iyunun 10-da səhər saatlarında Muğanlı-İsmayıllı yolunun 8-ci kilometrliyində, Şamaxı istiqamətində qeydə alınıb. İlkin məlumata görə, Məhəmməd Mübariz oğlu Vahidlinin idarə etdiyi "Mitsubishi" markalı, 10-VL-923 dövlət qeydiyyat nişanlı yük avtomobili hərəkətdə olarkən sürücünün idarəetməni itirməsi nəticəsində yol kənarındakı beton maneələrə çırpılıb.

Qəza nəticəsində nəqliyyat vasitəsi ciddi zədələnib, avtomobildə olan şəxslər müxtəlif dərəcəli bədən xəsarətləri alıblar.

Tibbi Ərazi Bölmələrini İdarəetmə Birliyindən (TƏBİB) verilən məlumata görə, hadisə ilə əlaqədar iki nəfər kişi Şamaxı Rayon Mərkəzi Xəstəxanasının Təcili yardım şöbəsinə hospitalizasiya olunub. Yaralılara dəqiqləşdirilməmiş kəllədaxili travma, çoxsaylı qabırğa sınıqları və bədənin müxtəlif nahiyələrinin əzilmiş yaraları diaqnozları təyin edilib, onlara zəruri tibbi yardım göstərilib.

1986-cı il təvəllüdlü Qoşqar Babayevin vəziyyəti nəzərə alınaraq daha ixtisaslı tibbi xidmət göstərilməsi məqsədilə Bakı şəhərində yerləşən akademik M.Topçubaşov adına Elmi Cərrahiyyə Mərkəzinə təxliyəsi həyata keçirilib.

1993-cü il təvəllüdlü Füzuli Abbaszadənin isə müalicəsi Şamaxı Rayon Mərkəzi Xəstəxanasında davam etdirilir. Həkimlər onun vəziyyətini orta ağır qiymətləndirirlər.

Baş Dövlət Yol Polisi İdarəsindən bildirilib ki, faktla bağlı araşdırma aparılır. Qəza nəticəsində ölən olmayıb.

Qeyd edək ki, ilkin məlumatlarda yalnız sürücünün xəsarət aldığı bildirilsə də, sonradan məlum olub ki, xəsarət alan şəxslər yük avtomobilində olan sərnişinlərdir.