Gəncə şəhərinin Poçt qəsəbəsində yerləşən restoranlardan birinin qarşısında baş verən kütləvi dava ilə bağlı yeni təfərrüatlar məlum olub.

Realmedia.info xəbər verir ki, "Qafqazinfo"nun yaydığı məlumata əsasən, hadisə zamanı həyatını itirən 1983-cü il təvəllüdlü Azər Yusifov dava edən şəxsləri ayırmağa çalışarkən bıçaq xəsarəti alıb.

Bildirilib ki, aldığı ağır bıçaq zərbəsindən hadisə yerində vəfat edən Azər Yusifov ailəli olub və iki uşaq atası idi.



Hadisə zamanı daha üç nəfər – 1995-ci il təvəllüdlü Rahib Bayramlı, 1998-ci il təvəllüdlü Tural İlyasov və onun həmyaşıdı Azamat Peşerskiy müxtəlif bıçaq xəsarətləri ilə Gəncədə yerləşən xəstəxanalardan birinə çatdırılıb.

TƏBİB-in məlumatına görə, avqustun 6-da saat 04:30 radələrində xəsarət alan üç nəfər Gəncə Şəhər Birləşmiş Xəstəxanasının nəzdində fəaliyyət göstərən Abbas Səhhət adına xəstəxananın Təcili tibbi yardım şöbəsinə hospitalizasiya olunub.

Həkimlər tərəfindən yaralılara zəruri tibbi yardım göstərilib. Müxtəlif bədən xəsarətləri alan şəxslərin vəziyyəti qənaətbəxş qiymətləndirildiyindən onlar ambulator müalicə üçün evə buraxılıblar.

Hüquq-mühafizə orqanlarının keçirdiyi əməliyyat-axtarış tədbirləri nəticəsində qətli törətməkdə şübhəli bilinən 2006-cı il təvəllüdlü M.Məmmədzadə saxlanılaraq istintaqa təhvil verilib.

Faktla bağlı cinayət işi üzrə araşdırma davam etdirilir.