Ukrayna Prezidenti Volodimir Zelenski Kiyevdə səfərdə olan Azərbaycanın xarici işlər naziri Ceyhun Bayramovu qəbul edib. Görüş zamanı iki ölkə arasında əməkdaşlığın inkişafı və regional məsələlər ətrafında geniş fikir mübadiləsi aparılıb.

Volodimir Zelenski sosial şəbəkə hesabında paylaşdığı məlumatda bildirib ki, Ceyhun Bayramov Rusiyanın genişmiqyaslı işğalından sonra Ukraynaya səfər edən ilk Azərbaycan xarici işlər naziridir.

Prezident qeyd edib ki, Azərbaycan nümayəndə heyəti səfərinə İrpen şəhərindən başlayaraq Azərbaycanın dəstək göstərdiyi məktəbi, xəstəxananı və reabilitasiya mərkəzini ziyarət edib.

Zelenski Azərbaycanın çətin dövrdə Ukraynaya göstərdiyi siyasi, humanitar və enerji dəstəyini yüksək qiymətləndirərək, bu həmrəyliyə görə təşəkkürünü ifadə edib.

Görüş zamanı Ukrayna Prezidenti ölkəsindəki mövcud təhlükəsizlik vəziyyəti, Rusiyanın davam edən hücumları, Qara dənizdəki vəziyyət və taxıl dəhlizlərinin bloklanması barədə Azərbaycan tərəfinə ətraflı məlumat verib.

Tərəflər yüksəksəviyyəli siyasi dialoqun davam etdirilməsi, müdafiə sahəsində əməkdaşlığın genişləndirilməsi, energetika, neft-qaz, kənd təsərrüfatı və digər iqtisadi istiqamətlər üzrə əlaqələrin inkişaf perspektivlərini də müzakirə ediblər.

Volodimir Zelenski sonda Azərbaycanın Ukraynaya göstərdiyi dəstəyə, humanitar və enerji yardımlarına, eləcə də iki ölkə arasında konstruktiv dialoqun inkişafına verdiyi töhfəyə görə minnətdarlığını bildirib.