Ümumdünya Şəhərsalma Forumunun 13-cü sessiyası (WUF13) çərçivəsində Bakıda tətbiq ediləcək xüsusi nəqliyyat zolaqları ilə bağlı yeni qaydalar açıqlanıb.

Azərbaycan Yerüstü Nəqliyyat Agentliyi (AYNA) İctimai nəqliyyat şöbəsinin müdiri Emin Məcidov bildirib ki, tədbir zamanı yaradılan zolaqlardan yalnız forum iştirakçılarının daşınmasını həyata keçirən nəqliyyat vasitələri istifadə edə biləcək.

Onun sözlərinə görə, həmin zolaqlarda hərəkət 24 saat fasiləsiz təmin olunacaq və digər nəqliyyat vasitələrinin bu zolaqlardan istifadəsi qəti şəkildə qadağan ediləcək.

Emin Məcidov əlavə edib ki, bu qayda avtobus zolaqlarında tətbiq edilən rejimə uyğundur və müəyyən edilmiş çərçivədən kənar istifadə halları inzibati məsuliyyət yaradır.

Daxili İşlər Nazirliyi Nəqliyyatı İntellektual İdarəetmə Mərkəzinin rəisi Namidan Piriyev isə qeyd edib ki, qaydaları pozan sürücülər inzibati məsuliyyətə cəlb olunacaqlar. Qanuna əsasən, belə hallarda 100 manat cərimə və 2 cərimə balı tətbiq ediləcək.

Qeyd edilib ki, WUF13 üçün nəzərdə tutulan xüsusi zolaqlarda qaydaların sərt şəkildə nəzarətdə saxlanılması planlaşdırılır.