Azərbaycanda 2026-cı il aprelin 1-dən etibarən qanunvericiliyə edilmiş bir sıra dəyişikliklər qüvvəyə minəcək.

Realmedia.info-nun məlumatına görə, yeni qaydalar əsasən inzibati məsuliyyət və müxtəlif tənzimləmə sahələrini əhatə edir. Dəyişikliklər ölkə başçısı tərəfindən təsdiqlənib və bir sıra fəaliyyət istiqamətlərində nəzarətin gücləndirilməsini nəzərdə tutur.

Qanunvericiliyə edilən yeniliklərə əsasən, elektron siqaretlərlə bağlı fəaliyyətlər üzrə məsuliyyət əhəmiyyətli dərəcədə sərtləşdirilir. Belə ki, elektron siqaretlərin istifadəsi, idxalı, ixracı, istehsalı, satışı və satış məqsədilə saxlanmasına görə inzibati məsuliyyət tədbirləri tətbiq olunacaq.

Yeni qaydalara görə, elektron siqaretlərin və onların komponentlərinin idxalı, ixracı, istehsalı, topdan və pərakəndə satışı, eləcə də satış məqsədilə saxlanılması zamanı qanun pozuntusuna yol verildiyi halda həmin məhsullar müsadirə ediləcək.

Bununla yanaşı, tətbiq olunacaq cərimələr də müəyyənləşdirilib:

Fiziki şəxslər 350 manatdan 500 manatadək,
Vəzifəli şəxslər 1650 manatdan 2200 manatadək,
Hüquqi şəxslər isə 4000 manatdan 5000 manatadək məbləğdə cərimə olunacaqlar.

Qeyd edək ki, bu dəyişikliklərin əsas məqsədi elektron siqaretlərin dövriyyəsinə nəzarəti gücləndirmək və ictimai sağlamlığın qorunmasını təmin etməkdir.