Azərbaycanəsilli Almaniya təmsilçisi Mədinə Bayramova (49 kq) U17 dünya çempionatı çərçivəsində keçirdiyi görüşdən sonra açıqlama verib.

Realmedia.info xəbər verir ki, gənc güləşçi qarşılaşmanın nəticəsindən narazı qaldığını bildirib.

“Dünən etiraz etsəydik, xal qazanıb, qələbəni əldə edə bilərdim”, – deyə Mədinə Bayramova bildirib.

O, altı yaşından Almaniyada yaşadığını və artıq bu ölkəyə tam uyğunlaşdığını söyləyib:

“On ildir Almaniyada yaşayıram. Düşünürəm ki, Azərbaycanda güləşə diqqət daha böyükdür. Burada güləşi sevirlər. Həm də azərbaycanlılar daha texnikalıdırlar. İlk dəfədir ki, Azərbaycanda güləşirəm. Lakin yay tətillərində Bakıya gəlirəm. Almaniyaya artıq uyğunlaşmışam. Hələlik Azərbaycanı təmsil etməyi düşünmürəm. Komanda yoldaşlarım daim mənə dəstək olurlar. Bakı barədə, ölkəmiz haqqında məndən soruşurlar.

Düzü, imkan olmur Azərbaycan güləşçilərinin çıxışını izləməyə. Amma bacardığım qədər ən azı öz çəkimdə çıxış edən idmançıların görüşlərinə baxıram. Mariya Stadnikin çıxışlarını isə yaxından izləyirdim”.

Qeyd edək ki, Mədinə Bayramova dünya çempionatının 1/4 final mərhələsində məğlub olaraq mübarizəni dayandırıb.