Sumqayıtda fəaliyyət göstərən "Nauka" Tədris Mərkəzinin yay düşərgəsində azyaşlı uşağın fiziki zorakılığa məruz qalması ilə bağlı iddialar gündəmə gəlib. Məsələ ilə əlaqədar hüquq-mühafizə orqanlarına müraciət olunub və hazırda araşdırma aparılır.

Azyaşlının anası Nuranə Mehraliyevanın sözlərinə görə, 7 yaşlı oğlu Tunar Abdullayev yay düşərgəsində olarkən müəssisənin meneceri tərəfindən çubuqla vurulub. Valideyn iddia edir ki, hadisə nəticəsində uşağın üz və bədən nahiyəsində müxtəlif xəsarətlər yaranıb.

Onun sözlərinə görə, övladı əvvəlcə hazırlıq kursuna, daha sonra isə tədris mərkəzinin bağçasına cəlb edilib. Valideyn bildirir ki, aylıq ödənişlə yanaşı, yay düşərgəsi və digər fəaliyyətlər üçün əlavə ödənişlər də edib.

Nuranə Mehraliyeva qeyd edib ki, hadisədən əvvəl də bağça əməkdaşlarının uşaqlarla kobud rəftarı ilə bağlı rəhbərliyə şikayət edib. Onun iddiasına əsasən, rəhbərlik hər dəfə problemin aradan qaldırıldığını bildirsə də, sonradan vəziyyətin dəyişmədiyi məlum olub.

Valideynin sözlərinə görə, hadisə Sumqayıt şəhərinin 5-ci mikrorayonunda yerləşən filialın təşkil etdiyi yay düşərgəsində, idman kompleksinin həyətində baş verib. O, qızının hadisənin şahidi olduğunu, digər uşaqların da baş verənlərlə bağlı məlumat verə biləcəyini bildirib.

Məsələ ilə bağlı açıqlama verən "Nauka" Tədris Mərkəzi isə səsləndirilən ittihamları qəti şəkildə təkzib edib. Müəssisədən bildirilib ki, fiziki zorakılıqla bağlı yayılan məlumatlar həqiqəti əks etdirmir və mərkəzin işgüzar nüfuzuna zərər vurur.

Açıqlamada qeyd olunub ki, hadisənin baş verdiyi iddia edilən vaxta aid müşahidə kameralarının görüntüləri araşdırılıb və müəllim və ya hər hansı əməkdaş tərəfindən uşağın döyülməsi və ya çubuqla vurulmasını təsdiqləyən fakt aşkarlanmayıb. Müəssisə bildirib ki, kamera görüntüləri, "WhatsApp" yazışmaları, səs yazıları və digər materiallar qorunub saxlanılır və zərurət yaranacağı təqdirdə istintaq orqanlarına və məhkəməyə təqdim ediləcək.

Daxili İşlər Nazirliyinin Mətbuat Xidmətinin əməkdaşı Cəsarət Qənbərli də faktı təsdiqləyərək bildirib ki, məsələ ilə bağlı polisə müraciət daxil olub. Hazırda müraciət üzrə prosessual araşdırma aparılır.

Qeyd edək ki, hazırkı mərhələdə səsləndirilən iddialarla bağlı hər hansı rəsmi hüquqi qiymət verilməyib. Araşdırmanın nəticəsindən sonra məsələyə hüquqi qiymət veriləcək.