Bakı Qızlar Universitetinin təhsil fəaliyyəti rəsmi qaydada dayandırılıb. Bununla yanaşı, universitetdə təhsil alan tələbələrin digər ali təhsil müəssisələrinə köçürülməsi təmin ediləcək.

Realmedia.info xəbər verir ki, Elm və Təhsil Nazirliyinin yaydığı məlumata əsasən, 10 iyul 2026-cı il tarixində keçirilən Akkreditasiya Şurasının iclasında universitet üzrə institusional və proqram akkreditasiyasının yekun qiymətləndirmə hesabatları müzakirə olunub.

Qiymətləndirmənin nəticələrinə əsasən, ali təhsil müəssisəsinin institusional və proqram akkreditasiyası üzrə yekun nəticə "uyğun deyil" hesab edilib. Qərarda bildirilib ki, universitetdə dövlət təhsil standartlarının, normativ hüquqi aktların və keyfiyyət təminatı tələblərinin icrasında ciddi uyğunsuzluqlar aşkar olunub.

Bununla əlaqədar olaraq, Elm və Təhsil Nazirliyi ali təhsil müəssisəsinin fəaliyyətinin dayandırılması ilə bağlı qanunvericilikdə nəzərdə tutulmuş prosedurlara başlayıb. Eyni zamanda, İqtisadiyyat Nazirliyinin 30 iyul 2026-cı il tarixli sərəncamı ilə Bakı Qızlar Universitetinə verilmiş lisenziya ləğv edilib.

Nazirlik bildirib ki, universitetdə təhsil alan tələbələrin təhsilinin fasiləsizliyi və təhsil hüquqlarının qorunması məqsədilə onların ixtisaslarına uyğun olaraq digər ali təhsil müəssisələrinə köçürülməsi təmin ediləcək.

Elm və Təhsil Nazirliyi vurğulayıb ki, akkreditasiya prosesinin əsas məqsədi ali təhsildə keyfiyyətin təmin edilməsi, tələbələrin hüquqlarının qorunması və təhsil müəssisələrinin fəaliyyətinin qanunvericiliyin tələblərinə uyğun təşkil olunmasıdır.