İtaliyanın Neapol şəhərində 4,7 maqnitudalı zəlzələ qeydə alınıb. Məlumata görə, bu, son 40 ildə bölgədə baş verən ən güclü yeraltı təkan hesab olunur.

Milli Geofizika və Vulkanologiya İnstitutunun məlumatına əsasən, zəlzələnin episentri Flegrey sahələri ərazisində, 3 kilometr dərinlikdə yerləşib. Bildirilib ki, bu bölgədə qədim sualtı vulkanın fəaliyyəti ilə əlaqədar kiçik zəlzələlər mütəmadi müşahidə olunsa da, indiyədək onların gücü 4 maqnitudanı keçməyib.

Yeraltı təkanlar Neapol şəhəri və ətraf yaşayış məntəqələrində də güclü hiss olunub.

İtaliyanın mülki müdafiə naziri Nello Musumeçinin sözlərinə görə, zəlzələ nəticəsində azı dörd nəfər müxtəlif dərəcəli xəsarətlər alıb.

Hadisə nəticəsində bir neçə yaşayış binasına və kilsəyə ziyan dəyib, şəhərin bəzi hissələrində isə elektrik enerjisinin verilişində fasilələr yaranıb.

Hazırda aidiyyəti qurumlar tərəfindən ərazilərdə vəziyyət qiymətləndirilir, dağıntılar və mümkün risklərlə bağlı araşdırmalar davam etdirilir.