Ermənistanın baş naziri Nikol Paşinyan istefa verib.

Realmedia.info xəbər verir ki, bu barədə baş nazir sosial şəbəkə hesablarında paylaşım edib.

Paşinyan bildirib ki, Ermənistan Konstitusiyasının 158-ci maddəsinə uyğun olaraq, yeni seçilmiş parlamentin fəaliyyətinin ilk günü hökumət istefaya gedir.

Yayılan görüntülərdə baş nazir hökumətin istefası ilə bağlı sənədi imzalayaraq Ermənistan prezidentinə təqdim edir.

Paşinyan qeyd edib ki, istefa verən hökumətin üzvləri yeni Nazirlər Kabineti formalaşana qədər öz vəzifələrini icra etməyə davam edəcəklər. Onun sözlərinə görə, yeni parlament fəaliyyətə başladıqdan sonra prezident parlament çoxluğunun irəli sürdüyü namizədi baş nazir təyin edəcək.

Qeyd edək ki, hökumətin istefası əvvəlcədən nəzərdə tutulmuş konstitusion prosedur çərçivəsində həyata keçirilib. Bu addım avqustun 2-də Ermənistanın IX çağırış yeni parlamentinin fəaliyyətə başlaması ilə əlaqədardır.

Xatırladaq ki, son parlament seçkilərində Nikol Paşinyanın rəhbərlik etdiyi "Vətəndaş Müqaviləsi" Partiyası səslərin 49,7 faizindən çoxunu toplayaraq yeni hökuməti təkbaşına formalaşdırmaq imkanı əldə edib.