İran İslam Respublikasının ABŞ üzərində qələbə qazandığına dair yayılan bəyanat beynəlxalq müstəvidə ciddi rezonans doğurub. Məsələ ilə bağlı Donald Trump kəskin reaksiya verib.

Realmedia.info xəbər verir ki, ABŞ prezidenti bu barədə özünün Truth Social hesabında paylaşım edib. O, CNN telekanalını dezinformasiya yaymaqda ittiham edib.

“CNN World News tərəfindən yayılan bu bəyanat saxtadır və kanal rəhbərliyi bunu çox yaxşı bilir”, – deyə Tramp bildirib.

ABŞ lideri vurğulayıb ki, İranın rəsmi mövqeyi əslində ölkənin xarici işlər naziri Abbas Araghchi tərəfindən sosial şəbəkələrdə yayılan sənəddə əks olunub. O qeyd edib ki, həmin sənədi “Truth Social” platformasında paylaşaraq ictimaiyyətə təqdim edib.



Tramp əlavə edib ki, artıq səlahiyyətli qurumlar CNN tərəfindən yayılan məlumatın arxasında cinayət tərkibinin olub-olmadığını araşdırır:

“CNN dərhal bu yalan xəbəri geri çəkməli və bu iyrənc reportaja görə üzr istəməlidir. Araşdırmanın nəticələri yaxın zamanda açıqlanacaq”.

Qeyd edək ki, daha əvvəl İranın Ali Milli Təhlükəsizlik Şurası ABŞ üzərində qələbə qazandıqlarını və Vaşinqtonun müəyyən şərtləri qəbul etməyə məcbur olduğunu iddia edən bəyanat yayıb. Lakin sonradan Abbas Əraqçı tərəfindən yayılan açıqlama ilə bu sənəd arasında müəyyən fərqlərin olduğu üzə çıxıb.

Digər tərəfdən, İran mediası ölkədə “qələbə”nin qeyd olunduğunu bildirib. Mehr News Agency tərəfindən yayılan görüntülərdə paytaxt Tehran küçələrində insanların bayraqlarla qeyd etmələr keçirdiyi əks olunub.
Bununla belə, yayılan ziddiyyətli məlumatlar beynəlxalq informasiya məkanında ciddi müzakirələrə səbəb olub və hadisələrin real mahiyyəti ilə bağlı suallar açıq qalır.