Əmanətlərin Sığortalanması Fonduna müxtəlif ölkələrdən, o cümlədən Rusiya və Tailanddan kiberhücum cəhdləri qeydə alınıb.

Bu barədə Fondun İT departamentinin sistem inzibatçılığı və proqramlaşdırma mərkəzinin müdiri Fərid Şirinov Şamaxıda keçirilən "Milli Mətbuat Günü: dialoq və əməkdaşlıq forumu"nda çıxışı zamanı məlumat verib.

Onun sözlərinə görə, qeydə alınan hücumların əksəriyyəti fişinq xarakterlidir və istifadəçilərin tanımadığı keçidlərə daxil olması yolu ilə həyata keçirilməyə çalışılır.

Fərid Şirinov bildirib ki, bu cür hücumlar zərərli keçidlər vasitəsilə şəbəkədəki digər kompüterlərə keçid imkanı yarada bilər. O qeyd edib ki, kiberhücumların mənbəyi IP ünvanları və coğrafi göstəricilər əsasında müəyyən edilir.

"Hücumların haradan gəldiyini IP və coğrafi məlumatlar əsasında təyin edirik. Bu cür cəhdlər müxtəlif ölkələrdən, o cümlədən Rusiya və Tailanddan olur. Sistem həmin cəhdləri avtomatik aşkarlayır, spam kimi bloklayır və zəruri təhlükəsizlik tədbirləri görülür", – deyə Fərid Şirinov bildirib.

O əlavə edib ki, Fondun informasiya təhlükəsizliyi sistemləri bu cür kiberhücumların qarşısının operativ şəkildə alınmasına imkan verir.