Dünyada artan geosiyasi gərginlik fonunda kiberhücumların miqyası genişlənməkdə davam edir. Bu hücumlar artıq təkcə bir ölkəni deyil, müxtəlif dövlətlərin informasiya sistemlərini hədəfə alan zəncirvari təhlükələrə çevrilib.

Realmedia.info xəbər verir ki, bu istiqamətdə NCSC Hungary tərəfindən təqdim edilən məlumat əsasında Elektron Təhlükəsizlik Xidməti-nin (Milli CERT) Rəqəmsal Təhqiqat Mərkəzi tərəfindən geniş araşdırma aparılıb.

Təhlil zamanı təqdim olunan texniki göstəricilər – URL və IP ünvanlar üzərində aparılan yoxlamalar nəticəsində hücumun mənbəyi və xarakteri müəyyən edilib. Məlum olub ki, yerli təşkilatlardan birinə məxsus veb-resurs kibercinayətkarların hədəfinə çevrilib.

Araşdırma göstərib ki, hücum edən şəxslər serverə zərərli kod və fayllar yerləşdirərək həmin infrastrukturu digər ölkələrin informasiya sistemlərinə qarşı icazəsiz müdaxilələr üçün istifadə ediblər. Bununla yanaşı, istifadəçilər fişinq məqsədli saxta resurslara yönləndirilib.
Elektron Təhlükəsizlik Xidməti tərəfindən həyata keçirilən operativ tədbirlər nəticəsində zərərli fayllar serverdən tamamilə silinib, mövcud boşluqlar aradan qaldırılıb və sistemin normal fəaliyyəti bərpa olunub.

Qurum hadisə ilə bağlı bir daha informasiya sistemlərinin sahiblərinə müraciət edərək kibertəhlükəsizlik tələblərinə ciddi riayət olunmasının vacibliyini vurğulayıb. Bildirilib ki, infrastrukturun mütəmadi yoxlanılması və qoruyucu tədbirlərin gücləndirilməsi bu cür hücumların qarşısının alınmasında əsas rol oynayır.