İranın həyata keçirdiyi hücumların Qətərin kritik sənaye infrastrukturuna yönəldildiyi bildirilir. Məlumata görə, zərbələr Mesaiddə yerləşən su anbarlarını, eləcə də Ras-Laffan sənaye zonasındakı “QatarEnergy” şirkətinə məxsus iri enerji kompleksini hədəf alıb.

İddialara əsasən, hücumlar ölkənin strateji əhəmiyyət daşıyan obyektlərinə qarşı təşkil olunub. Xüsusilə su təchizatı sistemləri və enerji infrastrukturu hədəfə çevrilib ki, bu da sənaye və enerji sektorunda müvəqqəti fasilələrə səbəb ola bilər.

Hadisə ilə bağlı rəsmi qurumların araşdırmaları davam edir. Zərərin miqyası və mümkün nəticələr barədə əlavə məlumatın yaxın saatlarda açıqlanacağı gözlənilir.
Qeyd edək ki, Ras-Laffan sənaye zonası Qətərin əsas enerji mərkəzlərindən biri hesab olunur və burada mayeləşdirilmiş təbii qaz (LNG) istehsalı həyata keçirilir. Mesaied isə ölkənin mühüm sənaye və logistika qovşaqlarından biridir.

Regionda artan gərginlik fonunda bu hadisə Yaxın Şərqdə enerji təhlükəsizliyi məsələsini yenidən gündəmə gətirib.