Rusiyanın 2030-cu ilə qədər xarici təchizatçılardan asılılığı minimuma endirmək və iqtisadiyyatı köklü şəkildə transformasiya etmək planları ekspertlər tərəfindən həddindən artıq optimist hesab olunur. Bu barədə “Financial Times” nəşri məlumat yayıb.

Məlumata görə, Qərb sanksiyalarından sonra Moskva qlobal təchizat zəncirlərindən ciddi şəkildə təcrid olunub və kritik texnologiyalardan asılılığı azaltmaqda çətinlik çəkir. Rusiya xüsusilə maşınqayırma, dron istehsalı və enerji sektoru kimi strateji sahələrdə idxaldan asılı olaraq qalır.

Hesabatda qeyd olunur ki, qeyri-enerji ixracının artırılması, daxili istehsalın gücləndirilməsi və xarici təchizat zəncirlərinin qurulması istiqamətində planlaşdırılan layihələr də gözlənilən nəticəni vermir. Rusiya İqtisadiyyat Nazirliyinin sənədində 2030-cu ilə qədər texnoloji müstəqilliyin sürətlə əldə ediləcəyi proqnozlaşdırılsa da, bir sıra ekspertlər bu hədəfləri real hesab etmir.

Araşdırmalara əsasən, sanksiyalar fonunda Rusiya Qərbdən əldə edə bilmədiyi texnologiyaları əvəz etmək üçün əsasən Çinə yönəlmək məcburiyyətində qalıb. Hətta bəzi hallarda Çin istehsalı olan məhsulların Rusiya istehsalı kimi təqdim edildiyi iddia olunur.

Sənəddə həmçinin nəzərdə tutulur ki, 2030-cu ilə qədər dövlət və özəl sektor tədqiqat və inkişaf xərclərini iki dəfədən çox artıraraq ÜDM-in təxminən 2 faizinə çatdırmalıdır. Eyni zamanda, əsas sektorlarda fəaliyyət göstərən şirkətlərin 80 faizinin Rusiya proqram təminatından istifadə edəcəyi proqnozlaşdırılır.

Finlandiyalı iqtisadçı Heli Simolanın fikrincə, Rusiyanın idxaldan güclü asılılığı fonunda bu planların həyata keçirilməsi çətin görünür. Tədqiqatçı Aleksandr Prokopenko isə bildirib ki, Putinin 2030-cu il hədəfləri real iqtisadi planlardan daha çox “fantaziyaya” bənzəyir.