ReAl Partiyasının sədri Natiq Cəfərli Ukraynadakı müharibənin Rusiyanın rəhbərliyi üçün ciddi problem yaratdığını bildirib.
“Rusiyanın Ukraynaya təcavüzü artıq İkinci Dünya Müharibəsindən də uzun sürür. Bu, Vladimir Putin və komandası üçün ciddi siqnal və antipiar elementidir. Bu yükün altından çıxmaq çox çətin olacaq. Kremlin rəsmi təbliğatçıları belə, bu qədər uzanan müharibəni izah etməyə söz tapmırlar”, – Cəfərli deyib.
O, Rusiyanın təqdim etdiyi yeni tezisləri də tənqid edib: “Onlar deyirlər ki, Ukrayna qardaş xalqdır, total müharibə aparmırıq və vətəndaşlara ziyan vurmaq istəmirik. Halbuki Rusiyanın təcavüzü nəticəsində həlak olan dinc ukraynalıların sayı 30 mindən çoxdur. Mariupolda ölənlər isə bu rəqəmə daxil deyil, çünki dəqiq sayı məlum deyil. Rusiyanın Ukraynada törətdiyi dağıntı və vurduğu ziyanın dəyəri isə 1 trilyon dolları keçib”.
Cəfərli qeyd edib ki, bu vəziyyət Kremlin imicinə ciddi zərbə vurur və uzun müddətli nəticələri olacaq.