Bu gün Azərbaycan Respublikasının hərbi quruculuğunda mühüm rol oynayan Səfərbərlik və Hərbi Xidmətə Çağırış üzrə Dövlət Xidmətinin yaradılmasının 14 ili tamam olur. Dövlət Xidməti 13 fevral 2012-ci il tarixində Azərbaycan Prezidenti, Silahlı Qüvvələrin Ali Baş Komandanı İlham Əliyevin fərmanı ilə təsis edilib və həmin vaxtdan etibarən ölkənin müdafiə sisteminin gücləndirilməsinə, çağırışçıların və ehtiyatda olan hərbi vəzifəlilərin hazırlığının artırılmasına, gənclərin hərbi-vətənpərvərlik ruhunda tərbiyəsinə böyük töhfələr verir.

Əsas fəaliyyət istiqamətləri
Dövlət Xidməti vətəndaşların ilkin hərbi qeydiyyata alınması, müddətli həqiqi hərbi xidmətə çağırışın təşkili, çağırışaqədərki hazırlığın həyata keçirilməsi, gənclərin hərbi-vətənpərvərlik ruhunda yetişdirilməsi və vətəndaş müraciətlərinə operativ cavab verilməsi üzrə fəaliyyət göstərir.

2025-ci ildə Xidmət mütəmadi təlim toplanışları keçirərək Silahlı Qüvvələrin ehtiyat resurslarının komplektləşdirilməsini təmin edib, çağırışçılar və ehtiyatdakı hərbi vəzifəlilərin döyüş hazırlığını artırıb. Müdafiə Nazirliyi ilə birgə keçirilən təlimlər və məşğələlər, hərbi biliklərin təkmilləşdirilməsi və praktiki vərdişlərin formalaşdırılması sahəsində xüsusi əhəmiyyət kəsb edib.

Gənclərin hərbi-vətənpərvərlik tərbiyəsi
Çağırışaqədərki yaşda olan gənclərin hərbi-vətənpərvərlik ruhunda yetişdirilməsi Dövlət Xidmətinin prioritet istiqamətlərindəndir. 2025-ci ildə Sabirabad, Şabran, Şəki, Astara, Lerik, Şəmkir, Göygöl, Ağstafa, Xaçmaz, İmişli və Kürdəmir rayonlarında məktəblilər üçün silsilə görüşlər, hərbi-idman oyunları və seminarlar təşkil olunub. Təhsil müəssisələrində çağırışaqədərki hazırlıq rəhbərləri tərəfindən gənclərə ilkin hərbi biliklərin aşılanması və praktiki vərdişlərin formalaşdırılması üçün nümunəvi dərslər keçirilib.

Rəqəmsallaşma və elektron xidmətlər
Xidmət vətəndaşlarla birbaşa təması minimuma endirmək, xidmətlərin operativliyini artırmaq və şəffaflığı təmin etmək məqsədilə müasir texnologiyalardan geniş istifadə edir. Hazırda Dövlət Xidmətinin təqdim etdiyi 6 növ arayış “MyGov” platforması üzərindən elektron qaydada əldə olunma imkanı var.

İlkin hərbi qeydiyyat prosesində tətbiq olunan yeni müddəalar çərçivəsində 15 yaşına çatmış kişi cinsli vətəndaşların qeydiyyatı, tələb olunan sənədlərin aidiyyəti dövlət orqanlarının elektron sistemlərindən alınması və valideynlərlə minimum təmas şəklində həyata keçirilir. Bu, şəffaflığın artırılmasına və vətəndaş məmnunluğunun təmin olunmasına xidmət edir.

Vətəndaş qəbulları və müraciətlər
2025-ci ildə Xidmət rəisi general-mayor Mürsəl İbrahimov Bakı şəhəri ilə yanaşı Sumqayıt, Şirvan, Lənkəran, Sabirabad, Tərtər, Tovuz, Göygöl, Qax, Ağsu, Naxçıvan, Mingəçevir və Xaçmaz şəhərlərində vətəndaş qəbulları keçirib. Bu qəbullarda 44 şəhid ailəsi və 72 müharibə veteranı daxil olmaqla, ümumilikdə 103 vətəndaş Xidmət aparatında, 298 nəfər isə bölgələrdə qəbul olunub.

Həmçinin “Çağrı Mərkəzi” vasitəsilə ötən il ərzində 25 mindən artıq müraciət cavablandırılıb.
Şəffaflıq və korrupsiyaya qarşı mübarizə
Xidmət fəaliyyətində şəffaflığın artırılması və korrupsiya hallarının qarşısının alınması məqsədilə 172 əməkdaş barəsində intizam tədbirləri görülüb. 9 əməkdaş mənfi əsaslarla ehtiyata buraxılıb və ya əmək müqaviləsinə xitam verilib. 44 fakt üzrə 93 nəfər barəsində toplanmış materiallar prosessual qərar üçün Baş Prokurorluğa təqdim olunub.

Beynəlxalq əməkdaşlıq və sosial dəstək
2025-ci ildə Türkiyə və Özbəkistan nümayəndə heyətləri Xidmətə səfər edərək əməkdaşlıq imkanlarını müzakirə edib. Hər zaman olduğu kimi şəhid ailələri və müharibə veteranlarına xüsusi diqqət göstərilib. 1 İyun – Uşaqların Beynəlxalq Müdafiəsi Günü münasibətilə şəhid övladları üçün tədbir təşkil olunub.

Maddi-texniki baza və inkişaf
Xidmətin aparatında və yerli struktur bölmələrində işin səmərəliliyini artırmaq məqsədilə yeni kompüter və digər texniki avadanlıqlar təmin edilib. Çağırışçıların və hərbi vəzifəlilərin daşınması üçün avtopark yenilənərək avtobus və avtomobillər alınıb.

Səfərbərlik və Hərbi Xidmətə Çağırış üzrə Dövlət Xidməti bundan sonra da Prezident İlham Əliyevin etimadını doğrultmaq, ölkənin müdafiə potensialını gücləndirmək və vətəndaş məmnunluğunu təmin etmək üçün fəaliyyətini davam etdirəcək.