Realmedia xəbər verir ki, Səfərbərlik və Hərbi Xidmətə Çağırış üzrə Dövlət Xidmətinin (SHXÇDX) təşkilatçılığı, Kürdəmir Rayon İcra Hakimiyyətinin dəstəyi ilə Kürdəmirdə “Vətənpərvər Azərbaycan gəncliyi – sağlam gənclik, sağlam gələcək” mövzusunda görüş təşkil olunub.
Tədbir Kürdəmir Rayon İcra Hakimiyyətinin inzibati binasında baş tutub. Görüşdə açılış nitqi ilə çıxış edən Kürdəmir Rayon İcra Hakimiyyətinin başçısı Elşən Həsənli bu cür tədbirlərin gənclər arasında vətənpərvərlik ruhunun gücləndirilməsində mühüm rol oynadığını vurğulayıb.
SHXÇDX-nin Çağırışaqədərki hazırlıq idarəsinin rəisi, polkovnik-leytenant Füzuli İsmayılov çıxışında müharibə dövründə Azərbaycan gənclərinin nümayiş etdirdiyi vətənpərvərlik nümunələrindən bəhs edib. O, gələcəyin əsgəri olacaq çağırışçıların fiziki və psixoloji hazırlıq səviyyəsinin yüksəldilməsi istiqamətində həyata keçirilən tədbirlər barədə məlumat verib. Eyni zamanda 2025-ci ilin ölkəmizdə “Konstitusiya və Suverenlik İli” elan olunması ilə bağlı iştirakçılara geniş izah təqdim edib.
Dövlət Xidmətinin İctimaiyyətlə iş və beynəlxalq əlaqələr şöbəsinin rəisi Pərviz Sədrəddinov ali məktəblərə hazırlaşan gənclərə tövsiyə və məsləhətlərini verib, xaricdə təhsil imkanları, təhsilə görə möhlət hüququ və xidmətlərin rəqəmsallaşdırılması mövzularına toxunub.
Daha sonra SHXÇDX-nin Kürdəmir rayon şöbəsinin rəisi, polkovnik-leytenant Siludin Əhmədov ilkin hərbi qeydiyyat, tibbi şəhadətləndirmə, çağırışçıların hüquq və vəzifələri barədə ətraflı məlumat verərək iştirakçıların suallarını cavablandırıb.
Tədbirdə iştirak edən Vətən müharibəsi qaziləri və şəhid ailələrinin üzvləri də çıxış edərək öz xatirə və təəssüratlarını bölüşüblər.
Qeyd olunub ki, bu qəbildən olan maarifləndirici və vətənpərvərlik tədbirləri ölkənin digər rayonlarında da keçirilir və növbəti aylarda davam etdirilməsi planlaşdırılır.