İyulun 27-dən avqustun 2-dək Bakıda keçiriləcək güləş üzrə U17 dünya çempionatı üçün Azərbaycanı təmsil edəcək hakimlərin adları açıqlanıb.

Azərbaycan Güləş Federasiyasının yaydığı məlumata görə, bir həftə ərzində Milli Gimnastika Arenasında təşkil olunacaq mötəbər yarışda ölkəmizi I-S kateqoriyalı hakim Sədi Quliyev, eləcə də I kateqoriyalı referilər Kamran Əliyev, Əli Babayev və Zaur Şərifov təmsil edəcəklər.

Bildirilib ki, dünya çempionatının görüşlərini ümumilikdə 68 beynəlxalq hakim idarə edəcək. Yarışın yüksək səviyyədə və beynəlxalq qaydalara uyğun keçirilməsi üçün müxtəlif ölkələrdən təcrübəli referilər Bakıda bir araya gələcəklər.

Qeyd edək ki, U17 dünya çempionatı gənc güləşçilərin ən nüfuzlu beynəlxalq yarışlarından biri hesab olunur və bu il də dünyanın müxtəlif ölkələrindən yüzlərlə idmançı medallar uğrunda mübarizə aparacaq.