İran Xarici İşlər Nazirliyinin sözçüsü İsmayıl Bəqayi bildirib ki, İran və Oman arasında Hörmüz boğazı ilə bağlı danışıqlar davam edir və hazırda boğazda gəmiçilik fəaliyyətində hər hansı dəyişiklik müşahidə olunmur.

Onun sözlərinə görə, iyulun 24-25-də Tehranda keçirilən görüşlər zamanı İran və Oman nümayəndələri Hörmüz boğazında təhlükəsiz gəmiçiliyin təmin edilməsi istiqamətində fikir mübadiləsi aparıblar.

Bəqayi qeyd edib ki, müzakirələr zamanı hər iki dövlətin suveren hüquqlarına hörmət prinsipi əsasında ortaq mexanizmlərin yaradılması və əməkdaşlıq yolları nəzərdən keçirilib. O, bu istiqamətdə əhəmiyyətli irəliləyiş əldə olunduğunu vurğulayıb.

XİN rəsmisi əlavə edib ki, Oman nümayəndə heyəti iyulun 25-i axşam Tehranı tərk etsə də, tərəflər arasında texniki və siyasi məsləhətləşmələr davam etdirilir.

İsmayıl Bəqayi bir daha vurğulayıb ki, hazırda Hörmüz boğazında gəmiçilik fəaliyyətinin normal rejimdə davam etməsi ilə bağlı vəziyyətdə hər hansı dəyişiklik qeydə alınmayıb.