ABŞ hərbi qüvvələri Hörmüz boğazında İran tərəfindən yerləşdirildiyi iddia olunan dəniz minalarının mövcudluğunu hələ də rəsmi şəkildə təsdiqləyə bilməyib.

“NBC News”un məlumatına görə, ABŞ ordusu bölgədə sualtı pilotsuz aparatlar, robot sistemləri, eləcə də pilotlu və pilotsuz hava vasitələri ilə axtarış əməliyyatları aparır. Araşdırmalar zamanı mina olduğu ehtimal edilən bir neçə obyekt aşkar edilsə də, onların həqiqətən dəniz minası olduğu sübuta yetirilməyib.

Məlumata əsasən, ABŞ kəşfiyyatı İranın boğazda minalar yerləşdirdiyini ehtimal etsə də, indiyədək bunu təsdiqləyən konkret dəlillər əldə olunmayıb. ABŞ hərbçiləri aşkar olunan obyektlərin əlavə yoxlamalardan keçirildiyini bildirirlər.

Bundan əvvəl ABŞ Prezidenti Donald Tramp İranla mümkün razılaşmanın şərtlərindən birinin Hörmüz boğazının tam açılması və minaların təmizlənməsi olduğunu açıqlamışdı. Lakin hazırkı araşdırmalar zamanı İranın boğazı minaladığı barədə qəti təsdiq ortaya çıxmayıb.

Qeyd edək ki, Hörmüz boğazı dünya enerji tədarükü baxımından strateji əhəmiyyət daşıyır və qlobal neft daşımalarının böyük hissəsi məhz bu marşrut üzərindən həyata keçirilir. Bölgədəki hərbi gərginlik səbəbindən ABŞ və müttəfiq qüvvələr təhlükəsizlik tədbirlərini davam etdirirlər.