Avstriya, Almaniya, İtaliya, İspaniya və Portuqaliyanın maliyyə nazirləri ABŞ-nin İrana qarşı hərbi əməliyyatları fonunda yanacaq qiymətlərinin artması nəticəsində enerji şirkətlərinin əldə etdiyi əlavə mənfəətə vergi tətbiq olunmasına çağırış ediblər.

Bu barədə “Reuters” agentliyinə istinadən məlumat verilib. Nazirlər qeyd ediblər ki, müharibə şəraitində yaranan iqtisadi üstünlüklərdən qazanc əldə edən şirkətlər cəmiyyət qarşısında məsuliyyət daşımalı və əlavə dəstək göstərməlidirlər.

Bundan əvvəl Birləşmiş Ərəb Əmirliklərinin energetika naziri Süheyl əl-Məzrui Hörmüz boğazında yaranan gərginliyin və tankerlərə hücumların qlobal neft bazarında ciddi qeyri-sabitlik yaratdığını bildirmişdi.

Xatırladaq ki, fevralın 28-də İsrailin müdafiə naziri İsrael Kats ölkəsinin silahlı qüvvələrinin İrana qarşı qabaqlayıcı zərbə endirdiyini açıqlamışdı. Ardınca ABŞ Prezidenti Donald Trump Vaşinqtonun da əməliyyatda iştirak etdiyini bəyan edib.

Buna cavab olaraq İran İsrailə onlarla ballistik raket atıb. İsrail Müdafiə Qüvvələri hücumları təsdiqləyib, ölkədə hava hücumundan müdafiə sistemləri aktivləşdirilib.
Martın 1-də İranın Ali Lideri Əli Xameneinin hücumlar zamanı öldüyü iddia olunub.

Gərginliyin artması fonunda İran ABŞ-nin hərbi bazalarının yerləşdiyi qonşu ölkələrin bir neçəsinə raket zərbələri endirib. Nəticədə həmin ölkələrdə hava məkanı müvəqqəti bağlanıb, həmçinin Hörmüz boğazından keçən gəmilərin hərəkətində ciddi problemlər yaranıb.