"Neftçi" klubu venesuelalı futbolçu Freddi Varqasın transferini rəsmən açıqlayıb.

Paytaxt təmsilçisinin yaydığı məlumata əsasən, İsrailin "Makkabi" (Netanya) klubundan transfer olunan Venesuela milli komandasının üzvü ilə 2+1 illik müqavilə imzalanıb.

27 yaşlı ön xətt oyunçusu ötən mövsüm satınalma hüququ ilə bir illik icarə əsasında "Neftçi"nin formasını geyinmişdi. O, bu müddətdə bütün turnirlər daxil olmaqla 34 rəsmi oyunda meydana çıxaraq 5 qol vurub və 8 məhsuldar ötürmə ilə yadda qalıb.

Freddi Varqasın çıxışı xüsusilə Azərbaycan Premyer Liqasının 30-cu turunda "Karvan-Yevlax"a qarşı vurduğu möhtəşəm qolla futbolsevərlərin diqqətini çəkmişdi. Həmin qolun videosu sosial şəbəkələrdə 30 milyondan çox baxış toplayaraq geniş rezonans doğurmuşdu.

Venesuela millisinin də şərəfini qoruyan futbolçu bu ilin mart ayında DÇ-2026-nın Cənubi Amerika zonası üzrə seçmə mərhələsində Ekvadora qarşı keçirilən oyunda milli komandanın heyətində meydana çıxıb.

Qeyd edək ki, "Deportivo Lara" klubunun yetirməsi olan Freddi Varqas karyerası ərzində ABŞ-də də legioner həyatı yaşayıb. "Neftçi" rəhbərliyi futbolçunun daimi transferini rəsmiləşdirməklə komandanın hücum xəttini daha da gücləndirməyi hədəfləyir.