İspaniyanın “Real Madrid” klubu 33 yaşlı müdafiəçi David Alabanın mövsümün sonunda komandadan ayrılacağını rəsmən açıqlayıb.

“Realmedia.info” xəbər verir ki, məlumat klubun rəsmi saytında yayımlanıb.

Klubun açıqlamasında David Alaba və ailəsinə gələcək həyatında uğurlar arzulanıb.

“Bu şənbə günü komandamızın son liqa matçı zamanı “Santyaqo Bernabeu” stadionunda ona ehtiramımızı bildirəcəyik”, – deyə açıqlamada qeyd olunub.

Avstriyalı futbolçu 2021-ci ilin yayından etibarən “kral klubu”nun formasını geyinirdi. O, bu müddət ərzində bütün turnirlərdə 131 oyunda meydana çıxıb, 5 qol vurub və 9 məhsuldar ötürmə edib.

David Alaba “Real Madrid”in heyətində iki dəfə İspaniya çempionu olub, iki UEFA Çempionlar Liqası titulunu qazanıb. Bundan əlavə, o, UEFA Superkuboku, iki İspaniya Superkuboku və bir İspaniya Kubokunun qalibi olub.