Türkiyənin “Fənərbağça” klubunun kapitanı və təcrübəli yarımmüdafiəçisi Mert Hakan Yandaş mərc oyunlarında iştiraka görə ağır cəza alıb.

Realmedia.info xəbər verir ki, Türkiyə Futbol Federasiyasının (TFF) qərarına əsasən, futbolçu Peşəkar Futbol İntizam Komitəsi tərəfindən bir il müddətinə diskvalifikasiya olunub.

Məlumata görə, Yandaş 2025-ci ilin dekabr ayında danışılmış oyunlar və qanunsuz mərc fəaliyyəti ilə bağlı aparılan istintaq çərçivəsində saxlanılmışdı. 2026-cı ilin fevralında ona qarşı rəsmi ittiham irəli sürülüb. Futbolçunun uzunmüddətli həbs cəzası ilə üzləşə biləcəyi qeyd olunurdu.
Aprel ayının əvvəlində isə o, dörd aylıq həbsdən sonra azadlığa buraxılmışdı.

Qeyd edək ki, 31 yaşlı futbolçu 2020-ci ildən “Fənərbağça”nın formasını geyinir. Bu müddət ərzində o, bütün turnirlərdə 149 oyunda meydana çıxaraq 11 qol vurub və 25 məhsuldar ötürmə ilə komandasına töhfə verib.

Hazırkı müqaviləsi 2026-cı ilin yayına qədər davam edən Yandaşın gələcək karyerası ilə bağlı vəziyyət isə hələlik qeyri-müəyyən olaraq qalır.