Hindistandan Böyük Britaniyanın paytaxtı Londondakı Hitrou hava limanına doğru həyata keçirilən sərnişin reysində gözlənilməz hadisə baş verib. Uçuş zamanı pilotlardan biri qəfil huşunu itirib və ona təcili tibbi yardım göstərilib.

Məlumata görə, təxminən 10 saat 30 dəqiqə davam edən uçuş zamanı təyyarə 9 min metr yüksəklikdə olarkən pilotun səhhəti kəskin pisləşib. O, süni tənəffüs aparatına qoşulub və ekipajın digər üzvlərinin operativ müdaxiləsi nəticəsində vəziyyət nəzarət altına alınıb.

İlkin məlumatlara əsasən, pilotun və ekipaj üzvlərinin səhhətində yaranan problemlərin Hindistanda yerləşdikləri hoteldə qəbul etdikləri səhər yeməyi ilə əlaqəli ola biləcəyi ehtimal edilir. Bildirilir ki, ekipaj üzvləri hoteldə səhər yeməyi yedikdən sonra küçə satıcısından alınmış qablaşdırılmış sudan da istifadə ediblər.

Hadisə nəticəsində təyyarə heyətinin digər üzvlərində də zəhərlənməyə bənzər simptomlar müşahidə olunsa da, onlar uçuşu davam etdirməyə müvəffəq olublar. Məlumata görə, bəzi pilotların vəziyyəti təyyarə Londona endikdən sonra daha da ağırlaşıb.

Hazırda həkimlər zəhərlənmənin dəqiq səbəbini müəyyənləşdirmək üçün müvafiq laborator analizlər aparırlar.

"British Airways" aviaşirkətinin açıqlamasında bildirilib ki, bütün çətinliklərə baxmayaraq uçuş təhlükəsiz şəkildə başa çatıb və sərnişinlər enişədək heç bir təhlükə ilə üzləşməyiblər.