Gürcüstanın aparıcı informasiya portalları və televiziya kanalları Azərbaycan Prezidenti İlham Əliyevin Almaniya Federativ Respublikasına rəsmi səfərini və bu çərçivədə keçirilən yüksək səviyyəli görüşləri geniş şəkildə işıqlandırıb.

Realmedia.info xəbər verir ki, bu barədə AZƏRTAC məlumat yayıb.

Məlumata görə, Gürcüstanın imedinews.ge, interpressnews.ge, 1tv.ge və palitranews.ge kimi nüfuzlu media qurumlarında Prezident İlham Əliyevin Almaniyaya səfəri, keçirdiyi görüşlər, eləcə də Almaniyanın Federal Kansleri Fridrix Mertslə birgə mətbuata verdiyi bəyanatlar barədə geniş materiallar dərc olunub.

Yayımlanan xəbərlərdə "Azərbaycan Respublikası və Almaniya Federativ Respublikası arasında ikitərəfli tərəfdaşlıq üçün strateji gündəliyə dair Birgə Bəyannamə"nin imzalanması xüsusi vurğulanıb və bu sənədin iki ölkə arasında münasibətlərin inkişafında yeni mərhələnin əsasını qoyduğu qeyd edilib.

Materiallarda Azərbaycanın regionda sülhün və sabitliyin təmin olunmasına yönəlmiş siyasəti, ölkəmizin Avropanın, o cümlədən Almaniyanın enerji təhlükəsizliyində oynadığı mühüm rol, təbii qaz tədarükü sahəsində əməkdaşlıq perspektivləri, Almaniyanın Cənubi Qafqazda sülh prosesinə verdiyi dəstək və ABŞ Prezidenti Donald Trampın iştirakı ilə paraflanmış sülh sazişinin əhəmiyyəti barədə ətraflı məlumat verilib.

Gürcüstan mediasında yayımlanan materiallarda Azərbaycan-Almaniya münasibətlərinin strateji tərəfdaşlıq səviyyəsinə yüksəlməsi, enerji, nəqliyyat-logistika və iqtisadi əməkdaşlığın genişləndirilməsi istiqamətində əldə olunan razılaşmaların regional əməkdaşlığa mühüm töhfə verəcəyi də xüsusi vurğulanıb.