Azərbaycan Prezidenti İlham Əliyevin Zəngilan şəhərində sakinlərlə görüşü zamanı səsləndirdiyi fikirlər beynəlxalq media qurumlarının diqqət mərkəzində olub.

Realmedia.info xəbər verir ki, dünyanın bir sıra aparıcı KİV-ləri dövlət başçısının Ermənistan-Azərbaycan sərhədindəki vəziyyət, Avropa İttifaqının müşahidə missiyası, Qərb ölkələrinin regiona münasibəti, eləcə də işğaldan azad edilmiş ərazilərdə həyata keçirilən bərpa-quruculuq işləri barədə açıqlamalarını geniş şəkildə işıqlandırıblar.



Rusiyanın RBK, “Vedomosti”, “Rossiyskaya qazeta”, “İzvestiya”, RT, REGNUM, “Komsomolskaya pravda”, “Moskovski komsomolets”, “Vzqlyad”, RTVI, Life, URA.RU, Lenta.ru və “Arqumentı i faktı” kimi nüfuzlu media orqanları Prezident İlham Əliyevin İrəvanda keçirilən sammit zamanı Avropa liderlərinin səsləndirdiyi bəyanatları “boş söz” adlandırmasına xüsusi diqqət ayırıblar.

Materiallarda dövlət başçısının Ermənistan-Azərbaycan sərhədində yerləşdirilən Avropa müşahidəçilərini tənqid etməsi, onların ilk ciddi təhlükə zamanı bölgəni tərk edəcəkləri barədə fikirləri ön plana çıxarılıb. Rusiya mediası, həmçinin Prezident İlham Əliyevin regionda sülhün əsas təminatçısının Azərbaycan olduğunu vurğulayan bəyanatlarına geniş yer verib.

Türkiyə mediası da Prezident İlham Əliyevin Zəngilan səfərini geniş işıqlandırıb. “Haber Global” dövlət başçısının şəhərin ilk yaşayış kompleksinə köçən ailələrlə görüşündən reportaj yayımlayıb. Materialda Prezident İlham Əliyevin Ümummilli Lider Heydər Əliyevin işğal altındakı torpaqların azad olunması ilə bağlı vəsiyyətinin yerinə yetirildiyini bildirməsi qeyd olunub.

“Bursa Hakimiyet” nəşri Prezident İlham Əliyevin çıxışında Heydər Əliyevin Azərbaycanın müstəqilliyinin qorunması, vətəndaş qarşıdurmasının qarşısının alınması və sabitliyin təmin edilməsindəki rolunu vurğuladığını yazıb.

“Anadolu” agentliyi isə Zəngilanda həyata keçirilən aqrar layihələrə diqqət çəkərək, “Dost Agropark”ın işğaldan azad edilmiş ərazilərdə yaradılan ilk kənd təsərrüfatı müəssisəsi olduğunu qeyd edib. Dövlət başçısının Bakı-Zəngilan dəmir yolu xəttinin yaxın illərdə istifadəyə veriləcəyi ilə bağlı açıqlaması da materiallarda yer alıb.

“Son Dakika” nəşri Prezident İlham Əliyevin Zəngilanda yeni yaşayış kompleksinə köçən ailələrə mənzillərin açarlarını təqdim etməsi və bölgədə aparılan genişmiqyaslı bərpa işləri barədə məlumat yayıb.

Gürcüstanın interpressnews.ge, bpn.ge, kvira.ge, exclusivenews.ge, palitranews.ge, timer.ge və digər aparıcı media qurumları da Prezident İlham Əliyevin çıxışını geniş işıqlandırıblar. Gürcü mediasında dövlət başçısının Azərbaycanın ədalətli mövqeyi, regional təhlükəsizlik və Avropa müşahidə missiyası ilə bağlı fikirlərinə xüsusi yer ayrılıb.

Belarusun “Sputnik Belarus”, Qazaxıstanın Lada.kz və Almaniyanın NEX24 nəşrləri də Prezident İlham Əliyevin Avropa İttifaqının Ermənistandakı müşahidə missiyası ilə bağlı səsləndirdiyi fikirləri oxucularına çatdırıblar.

Farsdilli “Khabar Nab”, “Khabarpu” və “Shafaqna” portalları isə Prezident İlham Əliyevin Ermənistan cəmiyyətində Azərbaycana qarşı nifrət təbliğ edən qüvvələrə münasibətdə ayıq-sayıq olunması ilə bağlı çağırışlarını və Aİ müşahidəçilərinə yönələn tənqidi fikirlərini diqqətə çatdırıblar.